Psixoloqdan məsləhətlər: Sərt pəhrizlər əvəzinə bu 6 vərdişi mənimsəyin

Yeni il, tətil öncəsi və ya sonrasında sağlamlığımızı yaxşılaşdırmaq qərarına gələndə ilk növbədə qidalanmamızı dəyişməyi, arıqlamağı və daha çox idman etməyi düşünürük.

Lakin ilk günlərdə yüksək motivasiya ilə başladığımız bu planları uzun müddət davam etdirmək çox vaxt çətin olur. Motivasiya azalır, davam etdirilməsi mümkün olmayan sərt pəhrizdən imtina edirik və nəticədə özümüzü daha pis hiss edirik.

Psixoloqlar isə sərt və məhdudlaşdırıcı pəhrizlər əvəzinə sağlamlığı, əhval-ruhiyyəni və həyat keyfiyyətini uzun müddət dəstəkləyən kiçik və davamlı dəyişikliklər etməyi tövsiyə edirlər.

1. Özünüzə qarşı mərhəmətli olun

Geyinərkən və ya güzgüyə baxarkən özünüzlə necə danışdığınıza diqqət edin.

“Görünüşümdən nifrət edirəm”, “Mən bacarıqsızam”, “Niyə özümü ələ ala bilmirəm?” kimi fikirlər keçirirsinizsə, özünüzdən soruşun: Eyni sözləri dostunuza deyərdinizmi?

Özünü sərt şəkildə tənqid etmək dəyişiklik prosesini həm çətinləşdirir, həm də uzunmüddətli olmasına mane olur.

Bəzən insanlar qidalanmadakı əskikliyi sərt pəhriz və həddindən artıq məşqlərlə kompensasiya etməyə çalışırlar. Lakin özünü cəzalandırmaq davamlı nəticə əldə etməyə kömək etmir. Dəyişikliyə bədəninizə hörmət və özünüzə mərhəmətlə yanaşaraq başlayın.

2. Səbirli olun

İllər ərzində formalaşmış vərdişləri bir neçə gün ərzində dəyişdirməyə çalışmaq real deyil. Kalorini kəskin azaltmaq, ağır məşq proqramına başlamaq və qısa müddətdə böyük nəticələr gözləmək əvəzinə mərhələli dəyişikliklərə üstünlük verin.

Kiçik dəyişikliklər zamanla böyük nəticələr verir. Üstəlik, belə dəyişikliklərin gündəlik həyata uyğunlaşdırılması və vərdişə çevrilməsi daha asandır.

Davamlılıq sürətdən daha vacibdir. Özünüzə vaxt verin.

3. Özünüzə suallar verin

Çəkinizdən və qidalanma tərzinizdən narazısınızsa, ilk növbədə gözləntilərinizin reallığa uyğun olub-olmadığını düşünün.

Sosial mediada gördüyünüz “ideal bədən” obrazları özünüz haqqında düşüncələrinizə təsir edir. Müxtəlif bədən quruluşlarını nəzərə almayan bu görüntülər insanın öz bədəni ilə münasibətinə mənfi təsir göstərir.

Bəlkə də sizə yeni qaydadan çox, baxış bucağınızı dəyişmək lazımdır. Özünüzü daha az tənqid edin və səbəbləri araşdırmağa çalışın.

Özünüzdən soruşun: “Özümdən niyə narazıyam?” Bəzən ehtiyac duyulan dəyişiklik məhz düşüncə tərzində olur.

4. Prosesdən zövq almağa çalışın

Motivasiya dəyişiklik etməyə kömək edir, zövq almaq isə həmin dəyişikliyi davam etdirməyə stimul verir.

Əgər yeni həyat tərzi gündəlik həyatınızı daha çətin və darıxdırıcı edirsə, onu uzun müddət davam etdirmək çətin olacaq.

Qidalanmada həqiqətən xoşunuza gələn dəyişikliklər edin. Yeni məhsullar və sadə reseptlər sınayın, dostunuzla birlikdə yemək hazırlayın.

İdmanda da eyni prinsip keçərlidir. Sizi qorxudan və ya sıxan məşq proqramı əvəzinə zövq aldığınız fiziki fəaliyyəti seçin.

Məqsədiniz ola bilər, amma ona çatmaq üçün uzun yol getməli olsanız, bu yolu özünüz üçün dözülməz hala gətirməyin.

5. Bədəninizi düzgün qidalandırın

Qidaları tez-tez “yaxşı” və “pis” olaraq qruplaşdırırıq. Bunun əvəzinə hansı qidaların beynin və bədənin ehtiyaclarını qarşıladığını düşünmək daha faydalı yanaşmadır.

Beyin sağlamlığını dəstəkləyən bir çox qida eyni zamanda ürək-damar və ümumi sağlamlıq üçün də faydalıdır.

Qidalanmada yalnız nələrdən imtina etməli olduğunuzu düşünmək əvəzinə, nələri əlavə edə biləcəyinizə diqqət yetirin.

Gündəlik qidalanmanıza daha çox qidalı məhsullar əlavə edin, bədəninizi və beyninizi ehtiyac duyduğu maddələrlə təmin edin. Sağlam qidalanma şirniyyatdan tamamilə imtina etmək demək deyil. Yeməkdən zövq almaq da sağlam həyatın bir hissəsidir.

6. Kiçik dəyişikliklərə fokuslanın

Davamlı qidalanma vərdişləri bir neçə həftəlik sərt proqramla deyil, illər ərzində atılan kiçik addımlarla formalaşır.

Məsələn, ağ çörək əvəzinə tam taxıllı çörəyə keçmək, hazır sıyıqlar əvəzinə yulaf yemək və qidalanmaya daha çox tam taxıl əlavə etmək kimi dəyişikliklərin hər biri kiçik görünsə də, zamanla böyük fərq yarada bilər.

Eyni anda bütün qidalanma sisteminizi dəyişdirməyə çalışmayın. Əvvəlcə bir və ya iki dəyişiklik seçin və onların gündəlik həyatınızın bir hissəsinə çevrilməsinə imkan verin. Daha sonra yeni vərdişlər əlavə edə bilərsiniz.

“Bunu yeyə bilmərəm” düşüncəsi əvəzinə “Bunun yerinə nə əlavə edə bilərəm?” yanaşmasını sınayın.

Kiçik addımlar daha davamlı ola bilər

Qidalanma və həyat tərzində dəyişiklik etmək üçün mütləq sərt pəhriz proqramına ehtiyac yoxdur. Daha vacib olan gündəlik həyatınıza uyğun və uzun müddət davam etdirə biləcəyiniz vərdişlər formalaşdırmaqdır.

Özünüzə qarşı mərhəmətli və səbirli olun, qidalanmanı cəza vasitəsinə çevirməyin və kiçik dəyişikliklərə üstünlük verin. Davamlı şəkildə tətbiq olunan kiçik addımlar zamanla daha böyük dəyişikliklərə çevrilir.

Mənbə:BBC

Hazırladı:Ziyalə Əhmədli

Gundelik.az